Newid sy’n Para

• Gwrando – gwrando ar oroeswyr bob amser, a gosod eu hanghenion wrth wraidd y gwaith
• Gofyn a Gweithredu – holi’r cwestiynau cywir yn ddiogel a gweithredu’n briodol
• Cymorth arbenigol – gwybod pryd a sut i atgyfeirio i’ch gwasanaeth arbenigol lleol
• Dulliau Gweithredu – darparu gweithdrefnau, rolau, gwybodaeth a hyfforddiant ar draws asiantaethau
• Annibyniaeth a rhyddid parhaus – cydweithio i sicrhau dyfodol annibynnol i oroeswyr.

I lawer o fenywod, pan fyddan nhw’n datgelu am y tro cyntaf eu bod nhw’n cael eu cam-drin, nid ydyn nhw’n cael ymateb cefnogol. Nid oes neb yn ymgynghori â nhw ynglŷn â’r ffordd orau o helpu i’w gwneud yn fwy diogel, er nad oes neb yn adnabod y cyflawnwr yn well nag y maen nhw mewn gwirionedd.

Yn aml caiff menywod sy’n datgelu cam-drin eu hasesu gan weithwyr proffesiynol am risg, sydd wedyn yn pennu pa lefel o gymorth sy’n cael ei roi, ac yn aml caiff y rhai sy’n cael asesiad lefel is o risg gynnig lefel is o gymorth. Gall menywod sy’n cael eu pennu yn ‘risg is’ fod yn gaeth i gam-drin heb y cymorth cywir i ddianc yn barhaol rhag y cam-drin hwnnw.

Rydym ni am newid hynny a sicrhau bod cymorth yn cael ei gynnig ar sail anghenion menyw a bod hynny’n adeiladu ar ei chryfderau a’r adnoddau sydd ar gael iddi. Gyda’r hawliau hyn, gall adeiladu ei hannibyniaeth, adfer o’r trawma mae hi wedi’i brofi a chael ei bywyd yn ôl.

Mae’r degawdau rydyn ni wedi’u treulio yn gweithio gyda goroeswyr, a thystiolaeth ymchwil, wedi dysgu ffordd well i ni. Drwy wrando ar fenywod gallwn ni ddarparu cymorth yn gynt a gwneud yn siŵr fod ei effeithiau yn para.

Mae ‘Newid sy’n Para’ yn ddull gweithredu newydd sy’n gosod y goroeswr wrth ei wriadd ac sy’n adeiladu’r ymatebion o gwmpas ei hanghenion hithau a’r cryfderau a’r adnoddau sydd ar gael iddi.

Yn rhy aml y gred yw bod y dull gweithredu hwn yn rhy gymhleth ac yn rhy ddrud. Felly i’w wneud yn gliriach rydyn ni wedi creu ffeithluniau, sy’n mynegi siwrnai’r menywod hyn, a’r siwrnai y gallent fod wedi’i dilyn. Mae’r rhain yn dangos y gost enfawr, mewn termau dynol ac ariannol, o beidio â gwrando ar fenywod ac ymateb i’w hanghenion.

Rydyn ni am barhau i eirioli am ymateb i bob math o drais yn erbyn menywod sy’n gosod menywod wrth ei wraidd.

Cymunedau yn aml yw’r cyntaf i wybod am berthnasoedd o gam-drin felly nod cynllun ‘Gofyn i Fi’ yw gwella dealltwriaeth cymunedau drwy ddarparu cwrs hyfforddi deuddydd ar sut i dorri’r tawelwch a chodi ymwybyddiaeth o drais yn erbyn menywod a merched. Bydd ganddyn nhw hefyd y dulliau gweithredu a’r hyder i ymateb yn briodol i oroeswyr os byddan nhw’n dewis rhannu eu profiadau.

Ar hyn o bryd caiff hwn ei ddarparu ar-lein dros ddeuddydd a hanner mewn partneriaeth â Respect. Mae wedi’i gynllunio i uwchsgilio gweithwyr proffeisynol sydd â chyswllt â darpar oroeswyr a/neu gyflawnwyr trais yn erbyn menywod, cam-drin domestig a/neu drais rhywiol i ‘adnabod arwyddion, ymateb i ddatgeliadau ac atgyfeirio i wasanaethau cymorth arbenigol.

Mae’r llinyn hwn o’r model yn ceisio gwella ymateb gwasanaethau cymorth arbenigol i fenywod sydd wedi’u heffeithio gan drais a cham-drin, drwy roi adnoddau i wasanaethau i gyflwyno/datblygu/adolygu arfau i gynorthwyo menywod drwy ddefnyddio dull gweithredu sydd wedi’i arwain gan anghenion, wedi’i seilio ar gryfderau, ac sydd wedi’i lywio gan rywedd a thrawma er mwyn cyflawni newid sy’n para a gwella llesiant menywod.