Newid sy’n Para

Ymagwedd newydd sy’n seiliedig ar gryfderau, dan arweiniad anghenion yw Newid sy’n Para sy’n cynorthwyo goroeswyr pob math o drais yn erbyn menywod, a’u plant, i adeiladu gwydnwch, ac arwain at annibyniaeth.

Ein hymagwedd:

• Gwrando – gwrando ar oroeswyr bob amser, a gosod eu hanghenion yn ganolog i’n gwaith
• Gofyn a Gweithredu – holi’r cwestiynau cywir yn ddiogel a gweithredu’n briodol
• Cymorth arbenigol – gwybod pryd a sut i atgyfeirio at eich gwasanaeth arbenigol lleol
• Offerynnau – darparu gweithdrefnau, rolau, gwybodaeth a hyfforddiant ar draws asiantaethau
• Annibyniaeth a rhyddid parhaus – cydweithio i sicrhau dyfodol annibynnol i oroeswyr.

Darllenwch grynodeb o ymagwedd Newid sy’n Para (PDF)

Pam fod hyn yn bwysig?

I lawer o fenywod, pan fyddan nhw’n datgelu am y tro cyntaf eu bod yn profi cam-drin, dydyn nhw ddim yn cael ymateb cefnogol. Does neb yn ymgynghori â nhw am y ffordd orau i helpu i’w gwneud yn fwy diogel, er bod neb yn adnabod y cyflawnwr yn well na nhw.

Yn aml caiff menywod sy’n datgelu cam-drin eu hasesu gan weithwyr proffesiynol am risg, sydd wedyn yn pennu pa lefel o gymorth a roddir iddynt, ac yn aml caiff y rheini a asesir ar lefel is o risg gynnig lefel is o gymorth. Gyda risg yn ddangoswr neu’n borth at gymorth, credwn fod menywod yn cael pecyn cymorth llai pwrpasol ac yna’n ei chael yn anodd dianc yn barhaol rhag y cam-drin.

Rydym ni am newid hynny a sicrhau bod cymorth yn cael ei gynnig ar sail anghenion menyw a bod hynny’n adeiladu ar ei chryfderau a’r adnoddau sydd ar gael iddi er mwyn iddi allu adeiladu ei hannibyniaeth, ymadfer o’r trawma mae hi wedi’i brofi a chael ei bywyd yn ôl.

Creu Newid sy’n Para

Mae’r degawdau rydym ni wedi’u treulio’n gweithio gyda goroeswyr, a thystiolaeth ymchwil, wedi dysgu ffordd well i ni. Drwy wrando ar fenywod gallwn ddarparu cymorth yn gynt a gwneud yn siŵr fod ei effeithiau’n para mewn gwirionedd.

Mae ‘Newid sy’n Para’ yn ymagwedd newydd sy’n gosod y goroeswr yn y canol ac yn adeiladu’r ymatebion o gwmpas ei hanghenion hi a’r cryfderau a’r adnoddau sydd ar gael iddi.

Yn rhy aml caiff yr ymagwedd hon ei hystyried yn rhy gymhleth ac yn rhy ddrud. Felly i egluro, rydym ni wedi creu ffeithluniau, sy’n mynegi llwybrau’r menywod hyn, a’r llwybrau y gallent fod wedi’u dilyn. Mae’r rhain yn dangos cost enfawr, mewn termau dynol ac ariannol, peidio â gwrando ar fenywod ac ymateb i’w hanghenion.

Rydym ni am barhau i eiriol am ymateb i bob math o drais yn erbyn menywod sy’n gosod menywod yn y canol.

Darllenwch straeon Sarah, Katrina ac Yasmin isod.

Sut mae’r model yn edrych?

Mae ‘Newid sy’n Para’ yn cynnwys 3 ffrwd, sydd, os ydy’r 3 yn gweithio gyda’i gilydd, yn gallu:

• darparu’r ateb priodol i oroeswyr lle bynnag a phryd bynnag maen nhw’n dewis rhannu eu profiad;
• sicrhau bod gwasanaethau’n gallu canfod cam-drin yn gynt a’u bod yn ymwybodol o sut i gyfeirio at gymorth arbenigol;
• darparu cymorth arbenigol i oroeswyr sy’n bwrpasol i’w hanghenion, yn adeiladu ar eu cryfderau ac wedi’i lywio gan drawma.

Y 3 ffrwd yw:

Gofyn i Fi

Cymunedau yn aml yw’r cyntaf i wybod am berthnasoedd o gam-drin felly nod cynllun ‘gofyn i fi’ yw gwella dealltwriaeth cymunedau drwy ddarparu cwrs hyfforddi deuddydd ar sut i torri’r tawelwch a chodi ymwybyddiaeth o drais yn erbyn menywod a merched. Byddant hefyd yn cael yr offerynnau a’r hyder i ymateb yn briodol i oroeswyr os ydynt yn dewis rhannu eu profiadau.

Gweithwyr Proffesiynol ag Ymddiriedaeth

Cwrs hyfforddi undydd, a ddarperir mewn partneriaeth â Respect, wedi’i gynllunio i uwchsgilio gweithwyr proffeisynol proffesiynol sy’n cysylltu â darpar oroeswyr a/neu gyflawnwyr trais yn erbyn menywod, cam-drin domestig a/neu drais rhywiol er mwyn adnabod arwyddion, ymateb i ddatgeliadau ac atgyfeirio at wasanaethau cymorth arbenigol.

Gwasanaethau Arbenigol

Mae’r ffrwd hon yn y model yn ceisio gwella ymateb gwasanaethau cymorth arbenigol i fenywod sydd â thrais a cham-drin yn effeithio arnynt, drwy ddyrannu adnoddau i wasanaethau gyflwyno/datblygu/adolygu offerynnau i gynorthwyo menywod gydag ymagwedd a arweinir gan anghenion, ar sail cryfderau, wedi’i llywio gan rywedd a thrawma er mwyn cyflawni newid sy’n para a gwell llesiant i fenywod.

Prosiectau a gyllidir gan Newid sy’n Para

Yn 2017-18 llwyddodd Cymorth i Ferched Cymru, mewn partneriaeth gyda Women’s Aid (Lloegr), i beilota’r ffrwd ‘gofyn i fi’ yn y model ‘Newid sy’n Para’ ym Mhowys, gyda chefnogaeth lawn ein Canolfan Argyfwng Teulu ym Maldwyn a Calan DVS. Gallwch weld yr effaith yma.

Yn dilyn llwyddiant cynllun peilot ‘gofyn i fi’, mae Cymorth i Ferched Cymru wedi sicrhau cyllid ar gyfer amrywiol brosiectau ‘Newid sy’n Para’ ar draws Cymru. Cliciwch ar bob rhanbarth isod i weld sut mae ‘Newid sy’n Para’ yn gweithredu ym mhob ardal.

• Prosiect Gofyn i fi
• Gweithwyr Proffesiynol Ag Ymddiriedaeth
• Gwasanaethau Arbenigol