Newyddion

Mae’r Amser ar Ben: Briff ac Adduned i Weithredu ar Ddiwrnod Rhyngwaldol y Menywod 2019

Ar Ddiwrnod Rhyngwladol y Menywod diwethaf (Mawrth 8^fed) arweiniodd Cymorth i Ferched Cymru dros 150 o weithredwyr, ymgyrchwyr, eiriolwyr a goroeswyr benywaidd i sefyll mewn undod gyda goroeswyr ar draws Cymru i ddweud bod yr Amser ar Ben ar ddrwgweithredwyr pob math o drais, cam-drin ac aflonyddu yn erbyn menywod, ac ar yr agweddau a’r diwylliant sy’n caniatáu i hynny ffynnu.

Gyda’n gilydd fe fynnom fod[1]:

• yr Amser ar Ben ar beidio ag adnabod, herio a chosbi ymddygiad drwgweithredwyr.
• yr Amser ar Ben ar fenywod a merched yn gorfod byw gyda’r profiad o aflonyddu, bygwth, trais a cham-drin o ddydd i ddydd.
• yr Amser ar Ben ar beidio â chredu goroeswyr aflonyddu rhywiol a’u beio am y cam-drin.

Eleni, i gyd-fynd â Diwrnod Rhyngwladol y Menywod ac i adeiladau ar weithredoedd ymgyrch ‘Mae’r Amser ar Ben’ yng Nghymru trwy gydol 2018-19,  hoffem eich gwahodd i addunedu i gefnogi cynllun gweithredu 5-pwynt er mwyn sicrhau bod yr Amser ar Ben ar aflonyddu rhywiol a cham-drin yng Nghymru. Dangoswch eich cefnogaeth os gwelwch yn dda i holl oroeswyr cam-drin ac i’r angen i ddal drwgweithredwyr i gyfrif.

Heddiw, safwn mewn undod i ddatgan bod yr Amser ar Ben ar aflonyddu rhywiol yng Nghymru, nid yw’n anochel a gellir ei atal trwy ei wrthsefyll gyda’n gilydd. Galwn am fyd lle mae cymunedau yn herio aflonyddu, trais a cham-drin menywod a merched, lle nad yw aflonyddu rhywiol yn cael ei oddef o gwbl o fewn ein sefydliadau addysgol, ein gweithleoedd, Senedd y DU na Chynulliad Cymru. Mae’r diffyg gweithredu i ddileu aflonyddu rhywiol a cham-drin yng Nghymru hyd yn hyn yn cael effaith  negyddol ar oroeswyr, ac ar bob menyw a merch, ac mae’n effeithio ar yr hyder cyffredinol mewn systemau i fynd i’r afael ag aflonyddu rhywiol a cham-drin.

Addunedwn i alw ar gyflogwyr, sefydliadau ac unigolion yng Nghymru i gymryd 5 cam i ddileu aflonyddu rhywiol a cham-drin:

1. Peidiwch cadw’n dawel. Helpwch greu cymunedau a gweithleoedd lle nad yw aflonyddu rhywiol a cham-drin yn cael ei oddef, a lle bo’n digwydd, sicrhewch y gweithredir arno ac y caiff drwgweithredwyr eu herio a’u dal i gyfrif.
2. Anogwch gyflogwyr i ddefnyddio polisïau cadarn, gweithdrefnau atebolrwydd clir a hyfforddiant effeithiol yn y gweithle er mwyn sicrhau bod y rheini sy’n datgelu aflonyddu rhywiol a cham-drin yn cael eu credu.
3. Grymuswch fenywod a merched i wybod eu hawliau ac i fanteisio arnynt ac i gael cyfiawnder heb gosb, a hynny mewn ffyrdd sy’n cynnwys anghenion menywod a merched Duon a lleiafrifol, menywod sy’n rhan o’r system cyfiawnder troseddol, menywod mudol, menywod hŷn, menywod anabl, menywod trawsrywiol, a menywod a merched mewn ardaloedd gwledig.
4. Mynnwch gyllid cynaliadwy i wasanaethau arbenigol hanfodol ar draws Cymru fel eu bod ar gael pryd bynnag a lle bynnag y bydd goroeswyr eu hangen.
5. Heriwch a dilëwch anghydraddoldeb rhywiol fel achos a chanlyniad aflonyddu rhywiol a cham-drin, ynghyd â systemau cysylltiedig o orthrwm a ddioddefir gan fenywod a merched megis rhagfarn ar sail rhyw, hil, gallu, dosbarth cymdeithasol neu oed, a homoffobia, trawsffobia, deuffobia, senoffobia ayyb.

#Mae’r Amser ar Ben#NifyddCymru’nCadw’nDawel

Llofnodwyr:

Adroddiad ar gynnydd ymgyrch ‘Mae’r Amser ar Ben’ yng Nghymru hyd yn hyn:

Yn 2018, aeth Cymorth i Ferched Cymru ag ymgyrch codi ymwybyddiaeth ‘Mae’r Amser ar Ben’ i wobrau  BAFTA Cymru ac i Ŵyl Ffilm Ryngwladol Caerdydd. Cawsom gyllid gan gronfa Cyfiawnder a Chydraddoldeb Time’s Up UK, a sefydlwyd o ganlyniad i Time’s Up byd-eang a’r mudiad #MeToo er mwyn darparu hyfforddiant a fydd yn cynyddu gwybodaeth a sgiliau gwasanaethau cymorth i fenywod ar draws Cymru i helpu menywod sydd wedi dioddef aflonyddu rhywiol a cham-drin.

Rydym hefyd wedi cyfarfod a chynnal digwyddiadau gyda gweithredwyr, gweithwyr proffesiynol ym myd diwydiant, y gyfraith ac addysg,  undebau, a chynrychiolwyr myfyrwyr er mwyn codi ymwybyddiaeth o brofiadau menywod. Clywsom gan fenywod o amrywiol gefndiroedd a phrofiadau er mwyn adnabod y camau sydd angen eu cymryd yng Nghymru i ni ddod yn genedl lle gall menywod a merched fyw yn rhydd o aflonyddu, a lle gallant gael y cyfle i ffynnu o fewn cymdeithas ddiogel a chydradd.

Er mwyn cyflawni hyn, mae rhwydwaith ein hymgyrch ‘Mae’r Amser ar Ben’ wedi’n hysbysu bod angen:

• Ymroddiad gan gyflogwyr i ddefnyddio polisïau cadarn, gweithdrefnau atebolrwydd clir a hyfforddiant effeithiol ac i hyrwyddo cydraddoldeb rhywiol o fewn y gweithle
• Hyrwyddo hawliau merched, gan gynnwys sicrhau bod modd i bob menyw fanteisio ar ei hawliau cyfreithiol a sifil er mwyn herio aflonyddu rhywiol
• Gwasanaethau cymorth arbenigol ar draws Cymru a gyllidir yn gynaliadwy fel eu bod ar gael pryd bynnag a lle bynnag y bydd goroeswyr eu hangen
• Dull trawsgysylltiol wedi’i weu i wneuthuriad ein gweithredoedd, gan sicrhau ein bod yn datgelu ac yn dileu’r holl agweddau, ymddygiadau a systemau gwahaniaethol sy’n cynnal ac yn lluosogi anghydraddoldeb i bob menyw

[1] http://www.welshwomensaid.org.uk/2018/03/women-wales-press-progress/